ĀBECE

                        Pošys pyrmuos ābecis pasaruodeja vydslaikūs kūkgrīzumā jau pyrma gruomotu drukuošonys muokslys izguoduošonys: taida sasaglobovuse Milanys bibliotekā ar Leonardo da Vinči zeimiejumim.

Ābece ir tautys gora atspulgs. Tei ir miniatura eņciklopedeja, kurā uzskotomā, saprūtamā i saistūšā veidā teik dūtys zynuošonys par sovys tautys viesturi, geografeju, kulturu, sasnāgumim dažaiduos dzeivis nūzarēs. Itei pyrmavuiceišonys gruomota ir pedagogejis i volūdneiceibys simbioze. Tei ir zynuošonu i školys simbols.

Vacais stolers Džepeto puordeve sovu mieteli, lai kūka lelei Pinokio (Buratino) nūpierktu gruomotu - nu, prūtams, ābeci.

Ābecis aizdavums ir īvadeit mozū bārnu burtu pasaulī, īvuiceit skaiteit dzymtajā volūdā. Ar ābeci suocās kuopīņs zineibu kolnā. Kū augstuok, tū plašuok pasaplieš debešu mola.

Cik pasaulī atškireigu tautu, volūdu, tik i atškireigu ābeču: bārnuduorza audzieknim, vuiceišonai sātā, pyrmklasnīkim, pīaugušajim, naredzeigajim, nadzierdeigajim... Dažaideiba i naatkuortojameiba ābeču pasaulī ir taišni apbreinojama. Kai poša volūdu pasauļa breinumi:

... turku volūdā ir vīns nakuortnais darbeibys vuords, angļu volūdā - 283, esperanto volūdā  nav nivīna;

... Zīmeļamerikys indiaņu čipeva volūdā darbeibys vuordam ir ap 12000 formu;

... tabasaranu volūdā ir 48 lītvuorda lūcejumi;

... kabardīšu volūdā vītnīkvuordam ir 28 personys;

... vysmozuok burtu ir havajīšu i Rotokys solys īdzeivuotuoju volūdys alfabetūs - 12 i 11;

... aini skaita itai: (2 x 20) - (7 + 10) = 23; francūži itai:  (4 x 20) + (10 + 7) = 97; dāni itai: 3 + 4½ x 20 = 93 vai  3 + (5 - ½) x 20 = 93;

... ubihu volūdā ir 80 - 85 leidzskaņu fonemys i vīna poša patskaņa fonema a;

... papuasu tangma volūdā ir tikai div kruosu apzeimiejumi: muli - malns, zaļš i mola - bolts, sorkons, dzaltons;

... aborigenu diirbalu volūdā ir četrys kuortys (dzimtis) - veirīšu, sīvīšu, videjuo i  ādamuo. Igauņu, angļu volūdā lītvuorda kuortys nav vyspuor.

Ābeču puorsteidzūšuo daudzveideiba atkareiga nu volūdys īškejuos uzbyuvis, vuiceišonys metoda (burtuošonys, skaņu (dzierdis), analitiski-siņtetiskuo, globaluo...), poligrafiskuos vareibys,  nu tautys mentalitatis. Ābecē kai iudiņa pileitē atspeid i laikmata praseibys, i tautys kulturys leidzīņs. Tei uzskotomi ruoda, kai kurai tautai dora golva i kai tei dūmoj par bārnim atīmūšajūs laikūs.

Munā kolekcejā ir apmāram 3000 ābeču nu 190 zemu 520 volūduos i dialektūs. Tei ir bejuse izstuodeita 119 reižu Latvejis muzejūs, školuos, bibliotekuos, klubūs, taipat 1987. godā Moskovā Vyssavīneibys Tautys saimisteibys sasnāgumu izstuodē, kurā kolekceja tyka apbolvota ar sudobra medaļu.

Kūpā ar filologi Lideju Leikumu asmu sarakstejs ābeci latgalīšu volūdā (1992.). Tei atsarūn pastuoveigajā ekspozicejā Šeņžeņā pasauļa VIP (Very Important Person - (cīši) īvārojama persona) centrā (Kīnā).

1996. godā apguods Zvaigzne ABC izdeve munu ābeci latvīšu volūdā; tei beja izstuodeita Storptautyskajā gruomotu tiergā Frankfurtē pi Mainys (Vuoceja).

Ir saraksteita ābece  i skaitomuo gruomota latgalīšu volūdys Purlovys izlūksnē.

Asmu pazeistams ar ābeču kruojiejim i Latvejā, i aiz tuos rūbežu - Slovenejā, Vuocejā, Austrejā, Dānejā, Kazahejā, Ukrainā, Jakutejā.

Prosu atsasaukt vysus, kuri var paleidzēt dareit boguotuoku munu kolekceju.

JURIS CIBUĻS

pastkaste 147

Rīgā,  LV - 1050

e-posts: juriscibuls@hotmail.com

juriscibuls@e-apollo.lv